,

2019 - FTV Jahresbericht 2019

Geschrieben von Moni Monn, Leiterin Schochen

Oises Turnerjahr hät am Mänitg, 7. Januar mit em erste Training wider agfangä.
Wüssemer no was mer müend machä?
Wiä jedes Jahr findet Endi Januar und afangs Februar Turn Show z’Wila statt.
S’Motto; Wältklass Wila, aglähnt as Wältklass-Meeting in Züri. Mir sind Staffelläufer gsi. Im UVLiächt
mit wiisä Stäb hämmer agfangä und nachher no e Vorführig mit dä Step gmacht. Alli
Riegene händ zum Thema passendi Darbütige zeiget und d’Sketchgruppä hät ois dur
s’Programm gführt. Mit em servierä häts au das mal super klappet. Zu mir hät öpper gseit: Was
scho wider im Service, jetzt sinder doch grad no uf dä Bühne gsi.
En grosse Dank gaht a oisi beidä Festwirtinne Fränzi und Helene, a d’Maya Berwert wo s’erst
mal dä Arbetsplan gmacht hät und a alli wo gschaffet händ a däne beidä Wucheend.
Am 16./17. Februar simmer uf Wildhuus a oises Wintersport-Wucheendi gfahrä.
I dä Stumps Alperose hämmer oises Gepäck chönne deponiere. Grad vor em Hotel händ mir
d’Ski chönne alegä und grad uf Wildhuus abä fahrä. D’Nöd-Skifahrer sind go laufä gangä.
Zum Aprésski hämmer ois bi dä Talstation troffö wo mer sogar no dä Karl Alpiger troffä händ.
Nachher händs ois mit dä Büssli wider is Hotel ufä bracht. Und scho hämmer wider en Termin
gha. Verusse am Füür häts Gühwii und vo dä Marianne mitbrachti Speckbrötli gäh. Sehr fein
gsi! Zum Znacht häts schwarzi Brötli gäh zum Salat und ich han chli es scharfs Chili sin Carne
gha. Am nöchste Morge händ sich alli am Zmorgebuffet gstärcht und sind nachher nomal uf
d’Ski oder was au immer. Dä Heiweg isch denn chli mühsam gsi. An Fasnachtsumzug hät
niemert dänkt. S’nöchst mal wüssed mir das und gnüssed liäber no chli länger d’Sunne.
Dankä villmal dä Bianca und dä Marianne für organisiere.
Am 16. März hät ois d’Helene a dä alljährlichä Breitesportkonferenz vom WTU in Winterthur
verträte, wo näbst allgemeine Infos au die kommende Turnfester präsentiert worde sind.
A dem Wucheend bin ich mit em Mario und em Othmar an Technischä Leiterkurs Frauä/Männer
35+ uf Filzbach.Nach dä Begrüessig händ alli en Mohrechopf becho bevor mir i d’Hallä sind.
Spannendi, luschtigi, aber au strängi Lektionä sind uf em Programm gstandä. Fit mit Jasschartä,
Step, Schlüüderball, Balancepad und no villes meh händ mir gmacht.
D’GV hämmer das Jahr am 25. März i dä Lotharstubä abghaltä. Mit Fotene vom vergangene
Jahr han ich Tischset kreiert. Nach em feine Znacht händ mir ois den gstärcht dä Versammlig
chönne widmä. Au i dem Jahr händ mir diversi Jubilarinne chönne beschenke. D’Ursi Bosshard
für 30 Jahr ftv, d’Madeleine Dübendorfer und Madeleine Röck für 20 Jahr ftv und d’Helene
Andrist und Marianne Waldvogel für 10 Jahr ftv.
Vor dä Pfinstferiä hämmer oisi beide erste gmeinsamä Trainings mit dä Männä absolviert.
S’Wätter isch i däre Wuche so schlecht gsi, dass mir i dä Halle d’Fit & Fun Spieli gmacht händ.
Isch chli en durenand gsi mit so vill Lüüt und wenig Platz. Nach dä Feriä hämmer dänn endli
chönne verusä. Di nöchstä 2 Wuchä hämmer fliessig am Mäntig- und Mittwuchabig uf dä
Wiesä s’Fit und Fun güebt.
Das Jahr staht ja s’grossä Eidgenössische Turnfest in Aarau uf em Programm. Da isch eifach
alles chli andersch und au bi de Ameldig händ dä Mario und ich es paar Stunde vor em Compi
verbracht bis mer alles richtig usgfüllt gha händ.
Im hütigä Ziitalter vom Internet, häts für das Turnfest sogar e eigets App gäh.
Da mir aber au no Seniore debi gha händ und nöd alli glich mit en Natel z’gang chömed händ
mir es Programmheft zäme gstellt mit dä wichtigstä Date/Infos und Fixpünkt. Am Beni sin
Uusdruck für das; äs Faltapp!
ftv wila - Jahresbericht 2019 2
Am Fritig, 21. Juni isch es denn sowiit gsi. Mit em erste Zug bin ich los gfahrä. Ab Züri händ
mich d’Sabrina und d’Marion uf Aarau begleitet.
D’Seniore sind dänn am 10 vor 6i und d’Frauä/Mannä am halbi 7ni uf dä Zug.
Wiä heissts so schön; Morgestund hät Gold im Mund. A dä Zentrale Meldestell, i dä nöchi vom
Bahnhof, bin ich fründlich empfange worde. So, dä erst Papierchram erledigt.
Mit em Bus simmer ziemli wiit use uf Rohr gfahrä. Det nomal a d’Meldestell di namentlich
usgfülltä Zettel go zeigä.
Und jetzt sötted doch d’Seniore im Festzelt si. Wo sinds denn? Scho han i s’erst mal afangä
umetelefoniere. Es händ ebe doch nöd alli s’Faltapp gstudiert und sich dra ghaltä.
D’Senoire händ ihrä Wettkampf am 9i mit em FF1 (Fuessballchorb+Ballchrüz) agfangä. Di eintä
sind noch chli nervös gsi. A di nöchst Diszipln FF2 (Unihockey+8er Ball) sind si denn elei
gangä will mir ois au händ müesse vorbereitä.
Mir händ am halbi 10i mit FF1 (Fuessballchorb+Ballchrüz) agfangä. Nei, das stimmt ja gar nöd.
Vorher händ mir no es Iturnä gmacht. Ich ha min Wonderboom (s’Musigböxli) mitgno wo mer
über s’Natel chan Musig lose. E praktischi Sach. Früener hät mer amel no dä Radio
mitgschleickt. D’Gruppe vom Enge, em Mario, dä Esther und dä Bianca hät im FF1 s’10i nur
grad um ein Punkt verpasst. D’Note vo 9.05 mit 24 Turner/inne isch super.
D’Steiheber sind nachher uf Wöschnau is Zentrum vom ETF gfahrä und dä reschtä isch bi dä
Seniore/inne bim FF3 (Moosgummiring+Intercross) go zueluege.. Super händs es gmacht.
Sozäge keis Ringli isch an Bode gheit.
Zäme simmer dän det in chlinä Biergartä ghöcklet. Mir mit em Mineral und d’Seniore/inne händ
sich nach em Wettkampfendi es Bier oder chli Wiisä verdient gha. Das mit dä Festwirtschaft
händs da in Rohr überhaupt nöd im Griff gha. Es isch vill z’lang gange bi mer öpis becho hät.
Bim Bierstand händ zwei gmüetlichi Berner nu gseit; Mir hei nöd dänkt, dass so vill Lüüt chöme.
D’Seniore/inne sind denn uf Lenzburg mit em Zug i d’Underkunft. I dä Mehrzweckhallä händ si
für alli d’Better bzw. Liegene reserviert.
Vom umesitzä chli schlapp, hämmer vor dä nöchstä Disziplinä FF3 (Moosgummiring
+Intercross) am 24 ab 12i grad wider es Iturne gmacht. Au es paar Sprints zum dä Puls ufäjagä
häts gäh. Es hät sich glohnt, alli Gruppene händ im Moosgummiring e super Leistig zeiget.
D’Gruppä mit em Roli, em Mario, em Sylvain, dä Sabrina, mir und em Enge als Fänger hät
sogar s’erst mal es 10i erreicht. Au im Intercross isch es recht guet gloffä. Di beschti
Mannägruppe hät es 9.61 und d’Frauägruppä mit dä Maya Bieri, dä Claudia Jehle und dä
Esther hät sogar es 10i gmacht. Si händ kein Ballverluscht gha. Ich ha no gseit, ich welli als
Disziplinhelfer dän kei Bäll go isammlä. Durchschnittnote 8.82 vo däne beidä Disziplinä und
9.75 vom Steihebe ergänd d’Note vom 2. Wettkampfteil.
Täsche packä und mit em Bus is Zentrum fahrä. Das isch ja villicht es Chaos gsi i däm Bus. Dä
Chauffeur hät zum Glück Humor gha. Alli usstiege, dur d’Fressmeilä laufe, immer wiiter und
wiiter hindere zum Schlüderball. Underwegs händ sich die eintä no schnell e Wurst kauft. Es
isch ja scho halbi zwei gsi und öppis gschieds hät no niemert gässe gha. Am 24 ab 2i isch es
det los gangä. Alli händ dä Schlüderball in Sektor gschossä und mir händ d’Note 9.02 becho.
D’Maya Berwert hät ihres Ziil vo 30m um 52cm übertroffe. Will ich über 35m wiit gschossä han,
han ich dä Maya quasi mini vorigä Meter chönne schänke und so simmer beidi uf es 10i cho.
Jupii!! Bi dä Mannä hät nur grad dä Beni diä 41m gschafft.
Dänn das ganzä Spieli mit em Fuessmarsch und Bus zrugg wider uf Rohr. Es händ nöd emal
alli Platz gha im glichä Bus. Zrugg in Rohr bin ich den zerscht mal go säge, das mir
wahrschindli nöd alli pünktlich werded da si. Es hät denn gheisse; Mir sölled eifach cho, wenn
alli da sind. Wiä toti Flügä sind di eintä underem Baum gläge oder gsässe. Ja ich weiss, ich bi
villicht chli gemein, aber so chammer nöd ane Disziplin. Drum hämmer halt scho wider es
chlises Ufwärme gmacht. Nach dä halbi 5i hämmer di letschtä beidä Disziplinä in Agriff gno.
S’FF2 (Unihockey+8er Ball). Au im Unihockey hät wider ei Gruppe es 10i erreicht. Im Achterball
händ sogar zwei Gruppe mit 155 und 156 Pünkt s’10i um nur grad 1 bzw. 2 Pünkt verpasst. Im
3. Wettkampfteil hämmer d’Note 8.84 übercho. Hej, mir händs gschafft!!! Jetzt hämmer ois es
Bier oder chli Wiisä verdient. D’Seniore/inne sind dänn au wider zu ois gstossä. Nachdem di
eintä no schnell duschet händ simmer den alli is Getümmel in Schachä. Det isch s’Zentrum
vom ETF gsi. Mit riesiger Fressmeilä, Festzälter, grosser Bühne, und no meh.
Mir händ oisi Täschä underem Baum deponiert und händ ois mit was au immer verpflegt. Es
hät für jedä Gschmack öpis gha.
Grad um di 12i häts dänn afangä ziemli fescht rägnä. Mir sind zu oisnä Täsche grännt, pflutsch
nass und händ gstudiert was machemer jetzt. Bus und Zug oder Taxi. Mir händ den es grosses
ftv wila - Jahresbericht 2019 3
Taxi für 5 gfundä und sind uf Lenzburg i d’Underkunft gfahrä. D’Beschriebig vo dä Seniore/inne
zu oisem Schlafplatz; Wenn ir dur Tür gönd uf dä linkä Siitä a dä Ussewand sind oisi Liegene.
Perfekt mir händs gfundä. No ziemli lär isch dä grossi Hallä gsi wo dänn schlussendli ca. 500-
600 Persone drin gschlafä händ.
Näbed oisäre Underkunft isch grad dä Riitplatz gsi. Si händ am däm Wucheend grad en Alass
gha und drum häts au e chlini Festwirtschaft det gha. Perfekt, für diä wo e Kafi brucht händ am
Morgä.
Am Samstig morge isch dä Festumzug uf em Programm gstandä und oisä nöchsti Fixpunkt isch
am viertel ab 2i bim Bahnhof gsi. Mir sind alli mit em Zug, ohni Billet, uf Beinwil am Hallwilersee
gfahrä. Det händ die einte es Pedalo oder es SUP gmietet, sind go badä oder händs sich i dä
Gartewirtschaft gmüetlich gmacht. Zum Glück isch dä Kayman erst nach em Turnfescht im See
uftaucht. Am Abig simmer denn alli ufs Pastaschiff. Nach drüü Stund Esse, Trinkä und
Schifffahrä simmer wider acho. Mit em Zug simmer zrugg uf Lenzburg wo di einte no en
Schlumi oder zwei gno händ i dä Altstadt. Dän lüütet doch no mis Natel. Dä Paul Spahn hät mir
nur wellä säge, das er nomal uf Aarau segi as Fescht. Mir händ nur müesse schmuntzlä.
Am Sunntig sind di eintä Seniore go s’Fuustball-Länderspiel Schiiz-Dütschland luege im
Stadion. Ich bi den go d’Leiterpriisä abhole i dä zentrale Meldestell und nachher bin i au no is
Stadion. Isch scho no idrucklich wiä diä spieled. Ich wet kein Ball abnäh vo däne.
Am 12i hämmer ois den, mit em TV abgmacht, i dä Kaserne besammlet für d’Rückreis. Uf em
Perron säg ich no zum Spass, hoffentli hämmer kei Verspötig! Und scho chunnt Durchsag,
dass genau oisä Zug spöter chunnt. Zur Folg hämmer dä Zug z’Züri und natürli au z’Winti
verpasst. Ich ha dänn dä Bianca aglütet das mir e halb Stund spöter werded acho. Dä
Verkehrsverein und diversi Lüüt händ nämlich uf ois gwartet am Bahnhof z’Wila. Mir sind
herzlich mit eme Apéro empfangä worde. No es Paar Föteli für Ziitig und das intensive
Wucheend isch z’Änd gsi. Ich has es lässigs, für mich chli z’grosses Turnfescht gfundä. Hät
Spass gmacht mit oi!
Seniore/inne
3. Stärkeklass/3-teilig, 9 Turner/inne 50. Rang (62) Gsamtnote 23.79
Frauä Manne:
2. Stärkeklass/3-teilig, 24 Turner/inne 19. Rang (58) Gsamtnote 27.05
dä beschti Zürcher Verein
Fit+Fun/1-teilig, 24 Turner/inne 7. Rang (22) Gsamtnote 8.84
Zwei Wuche spöter, hät am Fritig dä alljährlichi Indiancacup i dä Eichhalde-Turnhalle
stattgfundä. 6 Mannschafte händ sich agmuldä. Mir händ alles gäh, es hät aber eimal meh nöd
ganz zum Sieg glanget. Dä TV hät vor dä Manneriegä und em Unihockey gunnä. Mir sind uf em
Rang 4a glandet. Dankä villmal dä Festwirtinne, allne wo ghulfä händ und natürlich au dä
Spielerinne für ihre Isatz.
Am Mäntig druf häts s’Wetter guet mit ois gmeint. Mir händ ois zu Wurst, Schnitzelbrot und
Chueche ässe troffe bim Schochespielplatz.
Juhee! D’Summerferiä sind da.
D’Daniela hät au das Jahr es Summerprogrammm zäme gstellt. Rosinli, Sport am Pfäffikersee,
Brötlä uf em Schauäberg, Minigolf und en Spielabig bi dä Mädi.
Au dir es herzlichs Dankeschön für’s organisiere.
Am letschte Wucheend vo dä Sunmmerferiä, am 17. und 18. August simmer uf d’Vereinsreis.
Nach sage und schreibe 4 ½ Stund Zug fahrä simmer in Arosa acho.
Zerscht simmer is Hotel und händ oises Gepäck det chönne deponiere. Nacheme erste Apéro
simmer mit dä Wiishorn-Gondelbahn bis i d’Mittelstation gfahrä. Det hämmer en feine Zmittag
gässe und sind nachher no d’Bäre go aluege. Da stossemer doch druf a häts gheisse. Nachher
ftv wila - Jahresbericht 2019 4
sind alli i verschiedeni Richtigä gwanderet oder gfahrä. Di vollgfrässne Eichhörnli händ au
fascht kei Nüssli meh möge. Wider dunä acho sind di einte im Hotel no is Wellness vor em
Znacht. Nach em Esse hämmer is Restaurant im Dachgschoss gwächlset und händ det no en
Schlumi gno und Hose abe gspielt. Anderi sind nomal is Dorf go öpis trinkä. Nachem feinä
Zmorge hät jedi chönne mache was si hät wellä. Mir sind z’10tä höch mit dä Hörnlibahn ufä
gfahrä und dänn mit dä Urdäbahn übere i d’Lenzerheid. Vo det us simmer ums Parpaner
Wiishorn glofe und wider abe Richtig Älplisee. Det händ vier vo ois no es churzes Bad gno im
iischalte Bergsee bevor mir witer gloffä sind Richtig Restaurant Alpeblick. Vo det us isch es
nümme wiit gsi uf Innerarosa zum Bus. 20min hetted mir uf dä Bus müesse warte, drumm
simmer z’Fuess bis is Hotel zrugg. Am viertel vor 5i simmer dänn alli wider ufs Zügli Richtig
Chur. Vo det via St. Galle Winterthur wieder zrugg uf Wila. Am 9i und chli müed simmer alli, bis
uf Brigitte wo no dobe bliibä isch, wider z’Wila acho.
Dankä villmal dä Heidi Sauter, dä Margrit Bach und dä Brigitte Wespi für’s organisiere!!!
Im September isch vill los gsi. Am Samstig, 7. sind di eintä as Motocross uf Schlatt go helfe.
Am Abig hät dä Ueli Bodemaa z’Wila sis Jubiläum gfiiret und mir sind det go serviere und i dä
Chuchi go helfe. Dä Saal isch vollä gsi. Dä Andy Borg-Verschnitt Marcello Alexander hät dur dä
Abig gführt. Nach dä Instruktionä hät dän s’Fernseh vom TV 24 ihri Ufnahmä chönne mache. Di
eintä Musigstars sind scho chli speziell gsi. Am Sunntig wäred mir nomal uf Schlatt go helfe.
Leider händs es müesse witterigsbedingt absäge.
Am nöchstä Mittwuchabig sind es paar wenigi Frauä im Wisethal bi dä Chlikabliberschütze go
schüsse. Me oder weniger hämmer die Schiebä troffä. Hauptsach debi gsi!
Am Wucheend druf händ si ihres 75-jährigä Vereinsjubiläum gfiiret. Mir sind au dete i dä
Festwirtschaft go helfe.
Am Samstig, 28. September hät d’Sylvia ihrä 85. Geburtstag gfiiret. Si hät alli zumä Apéro
igladä. D’Sunnä hät für si gschunnä und es sind 16 Frauä is Aegetswil gloffä um mit ihrä
azstossä.
Am Sunntig isch s’alljährliche Schlussturne vo allne Vereine uf em Programm gstandä.
D’Sunnä hät ois au da tatchräfitg understützt.
Mir händ en Plausch-Poschtälauf i 2er-Gruppä mit dä Mannä gmacht. Agfangä hämmer mit
Pingpong. Mit eme Pingpongball eimal uf dä Tisch und dänn i einä vo 24 Espressobächer träffe.
Nöd eso eifach und natürli händ nöd alli Becher en Punkt gäh. Bim Poschtä Wösch isch chli
Gschicklichkeit gfröget gsi. Mit äm Muul es Chlüpperli näh, zu dä Leine laufä und dä Lumpä
ufhänkä wo dä Partner ghebet hät. Natürli händer au no müesse wächsle. Dänn simmer go
fischä. Mit meh oder weniger Muskelchraft und Konzentration isch es da wiiter gange. Öpper
sitzt mit dä Angelruete i d’Garette, dä anderi stosst und den sött mer mit em Haagä no en Fisch,
e Muschlä oder en Seestern fange. Nöd eso eifach gsi, aber luschtig. Witer isch es mit
Leitergolf gange. Mer hät müesse versueche zwei Chuglä wo ame Seil verbundä sind ane
Leitere werfe. Das hät bis zu däm Tag glaub no niemert gmacht. Also glichi Chance für alli. Uf
dä Wiese hämmer grad no es Streetball gmacht zum e chli i di neuä Fit+Fun-Spieli inä z’cho.
Dänn isch dä Hindernislauf dra gsi. Öpper hät d’Auge verbundä gha und dä oder diä anderi hät,
ohni z’berührä, dur dä Parcour müesse führe. Über e chlini Matte laufä, undereme Seili dure,
ums Bänkli ume über zwei Step inä und is Ziil. Es isch richtig amüsant gsi zum zueluege. Chom
mal hät gheisse und zrugg isch vo dä blindä cho, wo häre? Chasch eifach grad us laufä is Ziel,
aber stop hät si nüme gseit vor dä Rabatte. Zum Abschluss isch no e Schätzfrag z’beantwortä
gsi. Mir händ Federe in ä durchsichtigi Verpackig inä ta und ihr händ dörfe rötlä wievill das es
sind.
Nach em feine Zmittag vo oisere Festwirtschaft isch es am Namittag mit dä gmischtä
Plauschstafette wiiter gange.
ftv wila - Jahresbericht 2019 5
1. Rang Simone Huber und Peter Waldvogel
2. Rang Esther Senn und Andi Hofer
3. Rang Romy Bischofgerber und Paul Hösli
Ich glaub es hät allne jung oder älter Spass gmacht und es isch eimal meh en glunge Alass bi
sunnigem Wetter gsi. Und ihr händs ja ghört, au d’Seniore/inne händs ufs Podest gschafft.
Dankä villmal dä Claudia Jehle und dä Marina Furrer für organisiere vo dä Festwirtschaft.
Am Mäntig druf hämmer grad no dä Turnstand i dä Schoche-Turnhalle abghaltä.
Am Sunntig, 10. November isch es ois scho wider guet gange. Zwüsched 25 und 30 Frauä sind
mit dä Sylvia is Sunnebad ufe in Sterneberg go brunchä. Nach em feinä Ässe hämmer bi
Sunneschii diä mit Musig begleitäti Wassershow chönne bestunä.
Am 16. November hät vom Vorstand niemert Ziit gha zum a d’Delegiertäversammlig vom ZTV
in Oberglatt gah. Mir bechömed aber kei Buess, will mir ois vorgängig abgmuldä händ.
Das mal chli andersch als gwohnt, häts am 30. November en gmeinsamä Schlussabig mit em
Turnverein und dä Männerriegä ghä. Vo jedem Verein sind zwei oder drü im OK gsi. Bi ois sind
das d’Lilä Wagner und d’Jolanda Hösli gsi.
Uf em Zettel isch gstande: Erinnere dich an deinen Jugendhelden und verkleide dich als
solchen. Zerscht han i au denkt, nei so ein seich. Nachere Turnstund hämmer dän im
Restaurant heftig diskutiert als was das mer chönnted gah. S’OK isch als Schlumpfäfamiliä cho,
dänn hämmer grad mehreri Pippis gha eine sogar hoch zu Ross alias Simone, no meh
Schlümpf, di siebä Zwerge, e Mini Mouse, s’Rotchäppli, d’Wilma und dä Fred Feuerstein,
mehreri Pumuckels, en Meister Eder, e Häx wo uf em Bäse z’flüügä cho isch, Cowboys, es
Heidi, en Geissepeter und no villi me.
Am 4i hämmer ois im Eichhaldeschulhuus troffe, wo d’Gruppä bekannt gäh worde sind. Das
mer sich i dä durmischtä Gruppä nöd hät chönne verlührä, händs ois mit Schnüer zäme bundä.
A verschiedene Pöschte im Dorf hämmer dän oises Bescht chönne gäh. D’Lüüt uf dä Strass
händ ois scho chli komisch aglueget.
Zrugg im Eichhaldesaal händ ois d’Schlümpf en Salat und nachher Hackbratä mit
Härdöpfelstock serviert. Für dä Dessert isch d’Männeriege zuästänig gsi. Es hät meh we gnueg
gha.
Als Abschluss hät dän jedi Gruppä no e chlini Darbütig dörfe/müesse machä.
Es isch en lässigä Abig gsi, dankä villmal für organisiere.
Das wärs gsi vom Turnerjahr 2019 oder doch nonig ganz?
Mir vo dä Schochä händ ois mal zu später Stund bereit erklärt au es Adventsfenster z’machä
und zwar i dä Turnhallä.
Z’siebte hämmer ois am Samstig, 14. Dezember im Oberstufäschuelhuus zum bastlä troffä. Mit
Cutter/Schniedmesser usgrüschtet hät sich jedi eis vo däne 16 Papier gschnappt und hät
agfangä Schriftä, es Ängeli, en Rudolf, Sterne und no meh uszschniedä. Für di eintä isch das
en richtigä Gnuss gsi. Im grosse Vorplatz hämmer diä fascht 70x70cm grossä Blätter anegleit
und überleit mit wellere Farb mer welles Bild sölled hinderlegä. Jetzt no uf dä richtigä Siitä
s’farbigä Drachepapier anächläbe und fertig simmer gsi nach 4 Stund. Am Mäntig druf hämmer
diä Papier no müessä bi dä Turnhallä a d’Fensterschiibä chläbe und verusse händ’s es Buffet
mit allerlei feine selber bachnä süessä und salzigä Sachä, Glühwii und Punsch parat gmacht.
Und das es nöd ganz eso dunkel gsi isch hät ois dä Hausi ganz vill Holz anägschleppt für
d’Füürschale.
Es hät eifach super schön usgseh oises Fenster. Ich ha uuh froid gha! Mega lässig gsi, das ihr
alli mitghulfä händ.
ftv wila - Jahresbericht 2019 6
Dä Ufwand hät sich uf jede Fall glohnt. Dank dä Simone hämmer mit oisem Fenster dä Event
vom Jahr 2019 im Crossity gunne.
Am 8i sind mir vo dä Schochä den no i Turnhalle oisi beidä Tänz go üebe. Villicht isch es bi dä
eintä oder andere chli besser gangä mit em Hüftschwung nach em Glühwii.
D’Eichhaldegruppe hät no en Spaziergang durs Dorf gmacht, wo si di andere Adventsfenster
sind go bestuhnä.
So, das isch es jetzt aber würkli gsi vo oisem Turnerjahr 2019.
Es isch es lässigs, aber au sehr intensivs Vereinsjahr gsi. Di stränge, aber au luschtigä
Trainings händ sich glohnt.
En grosse Dank gaht a oi alli, wo chömed go turne, cho helfe schaffä oder suschtigi Sachä
mached für dä Verein.
En herzlichä Dank gaht a d’Margrit Stahel für ihrä Isatz als Kampfrichter und a d’Leiterinne vo
dä Eichhaldegruppe. Es grosses Dankeschön a mini Vorstandgspändli, wo au sehr vill leischtet
s’ganzi Jahr dur.

Ich freu mich uf es chli gmüetlichers Jahr mit oi allne.
(Das han i im Januar gschriebä)

Oi Leiterin Moni